خیبرپختونخوا کے شمالی علاقے کوہستان کے دور افتادہ علاقے میں نوجوان لڑکے اور لڑکی کو فائرنگ کرکے قتل کردیا گیا، گذشتہ تین ماہ میں اس نوعیت کا یہ تیسرا واقعہ ہے۔
تھانہ کوز پارو کے ایس ایچ اور محمد جاوید خان نے خبر کی تصدیق کرتے ہوئے کہا کہ بار پارو کے علاقے چپرگی میں ایک خاتون اور ایک مرد کو قتل کیا گیا۔ پولیس کو علاقے میں پہنچنے کے بعد خون میں لت پت دو لاشیں ملیں۔
پولیس کے مطابق یہ لڑکا اور لڑکی چپرگی علاقے کے رہنے والے ہیں۔ پولیس کی جانب سے درج کرائی گئی رپورٹ کے مطابق “ابتدائی معلومات سے معلوم ہوتا ہے کہ مقتول لڑکی کے بھائی اور والد کو گولیاں مار کر قتل کیا گیا اور ایسا لگتا ہے کہ یہ غیرت کے نام پر قتل ہے، بعد ازاں ملزمان علاقہ چھوڑ کر فرار ہو گئے”۔
ایک دیہاتی نے نام ظاہر نہ کرنے کی شرط پر بتایا کہ گولی مارنے کے بعد نوجوان کی لاش کے ٹکڑے کر دیے گئے۔ ان کا کہنا تھا کہ کوہستان میں اس طرح کی حرکتیں سختی سے منع ہیں اور اگر کسی کا کسی کی بیٹی یا بہن سے رشتہ ہو تو اسے مقامی زبان میں ’’ٹھگ‘‘ کہا جاتا ہے، جس کے مطابق ’’اسے کسی صورت معاف نہیں کیا جائے گا اور جرگہ کے فیصلے کے بعد ان دونوں کو ان کے گھر والوں نے قتل کر دیا ہے۔
بی بی سی کے مطابق ایک مقامی پولیس اہلکار محمد ریاض کا کہنا ہے کہ واقعے کے بعد پولیس کوز اور برپارو بھیج دیا گیا ہے اور ملزمان کی گرفتاری کے لیے کوششیں کی جا رہی ہیں۔خیال رہے کہ گذشتہ سال 27 نومبر کو سوشل میڈیا پر جعلی تصاویر شائع ہونے کے بعد ایک لڑکی کو قتل کر دیا گیا تھا، جس پر جرگہ کے ارکان اور ملزمان کو گرفتار کر لیا گیا تھا اور اب کیس عدالت میں ہے۔
اسی طرح اکتوبر 2023 ءمیں ایک لڑکی کو لڑکے کے ساتھ تعلقات کی بنا پر قتل کرنے کا منصوبہ بنایا گیا تھا لیکن لڑکی کو اس بات کا علم ہوا اور اپنی جان بچانے کے لیے پولیس کے پاس گئی اوراسے دارالامان بھیج دیا گیا۔
2012 ء میں کوہستان میں ایک شخص نے دعویٰ کیا کہ ایک ویڈیو جاری ہونے کے بعد جرگے نے دو لڑکوں اور چار لڑکیوں کو قتل کرنے کا فیصلہ کیا۔ ویڈیو میں دکھایا گیا تھا کہ چار لڑکیاں بیٹھی ہیں اور تالیاں بجا رہی ہیں، ایک لڑکا ڈانس کر رہا ہے اور دوسرا ویڈیو ریکارڈ کر رہا ہے۔
ویڈیو بنانے والے لڑکے نے بتایا تھا کہ ان چاروں لڑکیوں کو 30 مئی 2012 ء کو قتل کیا گیا تھا۔ اس شخص کو بعد میں 2019 ءمیں گولی مار کر ہلاک کر دیا گیا تھا۔ہیومن رائٹس کمیشن آف پاکستان کی رپورٹس کے مطابق 2016 ء میں 1100، 2014 ءمیں 1000 اور 2013 ء میں 869 خواتین کو ان کے قریبی رشتہ داروں نے غیرت یا شرم کے نام پر قتل کیا۔ غیرت کے نام پر قتل ہونے والی خواتین کی اصل تعداد بتائی گئی تعداد سے زیادہ ہو سکتی ہے۔
